Hafslo 1875

Kilder og artikler

Folketeljinga 1875 for Hafslo

Hafslo prestegjeld tilhøyrer i dag Luster kommune i Sogn og Fjordane.

Denne folketeljinga vart i si tid dataregistrert i samband med bygdebokarbeidet for Luster kommune, som framleis er under arbeid. For meir om sjølve bygdebokprosjektet viser eg til heimesidene til Luster kommune. Kopi av folketeljinga er oversendt Digitalarkivet/Digitalpensjonatet, men grunna måten registreringa er gjort på viser det å vera ein del arbeid med å få ordna med søkjefunksjonane hjå Digitalarkivet. Difor har eg valt å gjera folketeljinga tilgjengeleg for nedlasting frå heimesidene til Norsk Slektshistorisk Forening slik at dei som har trong til å nytta denne i arbeidet sitt kan gjera det. Det einaste eg stiller som krav er at registrator vert kreditert for arbeidet sitt dersom noko av materialet vert nytta i publikasjonar – anten det er på nett eller i papirform. Desse filene vil verta liggjande for nedlasting sjølv når teljinga vert tilgjengeleg på Digitalarkivet for søk.

Folketeljinga er registrert med det DOS-baserte programmet BD87, og følgjer dermed den standarden for registrering som vart nytta der, den såkalla Standard 4G. Ved bruk av fila er det difor nyttig at eg her forklarar kort korleis databasen er bygt opp. Særskilt er det to felt som er viktige å vita kva inneheld.

Det første er feltet "ID". Dette er berre eit løpenummer i databasen, og har ingen annan funksjon.

Det andre feltet er "Typefelt." Eg vil her gje eit lite oversyn over kva dei forskjellige nummera står for.
    0 er forsida av teljingsskjemaet som mellom anna inneheld matrikkelnummer og gardsnamnet
    1 er hovudpersonen i hushaldninga
    2 er øvrige personar i hushaldninga
    3 er fråverande personar i hushaldninga
    4 er baksida av teljingsskjemaet og inneheld jordbruksopplysningar og opplysningar om kreatur
    8 markerer starten på ein ny teljingskrins
    9 markerer slutten på ein teljingskrins

Dei øvrige felta skulle vera sjølvforklarande. Men litt om jordbruk og kreatur. I folketeljingslistene kjem det fram jordbruksopplysningar og informasjon om dyra på garden. Dette er litt kryptisk registrert, og eg skal forklara dette også.

Jordbruksopplysningar kan sjå slik ut: by2 po6. Dette tyder rett og slett at utsæden på bruket var 2 tønner bygg og 6 tønner poteter. Forkortingane som er nytta er følgjande: kveite (hv), rug (ru), bygg (by), blandkorn (bl), havre (ha), grønnfor (gr), erter (er), vikker (vi), grasfrø (fr), poteter (po) og andre rotfrukter (ro).

Kreaturopplysningar kan sjå slik ut: he1 fø1 ku13 ka2 få35. Det tyder at det på dette bruket var 1 hest, 1 føll, 13 kyr, 2 kalvar og 35 får. Forkortingane er som følgjer: hest (he), føll (fø), okse/tyr (ty), ku (ku), kalv (ka), sauer/får (få), geiter (gj), grisar (gr) og reinsdyr (re).

Eg har valt å gjera filene tilgjengelege i tre format. dBase III (som nokre kan henda framleis hugsar) er eit standard databaseformat, Excel versjon 3 for rekneark, og vanleg tekstfil for øvrige program. Vidare ligg kvar fil komprimert som eksekverbare filer, slik at det berre er å "dobbeltklikka" (i alle høve for Windowsbrukarar) på fila, etter at den er lasta ned, så pakkar den seg ut sjølv.

Eg håpar materialet kjem til nytte, og oppmodar igjen alle til å kreditera registrator for arbeidet. Dersom nokon ynskjer å leggja igjen pengar for arbeidet, kan 50 kroner betalast ved passande høve til Norsk Slektshistorisk Forenings konto 0805 5165212.

Jo Rune Ugulen, 14. februar 2001

Folketeljinga 1875 for Hafslo (dBase III-format)

Folketeljinga 1875 for Hafslo (MS Excel 3 format)

Folketeljinga 1875 for Hafslo (Tekstfil)


	\| nettpubl. \| NST \| genealogen \| strays \| eur. aner \| linker \| søk